रवि पाण्डेय
बर्दघाट,पौष–१८
बर्दघाट नगरस्तरीय विपद् ब्यवस्थापन समितिले पुनः प्रयोग गर्न मिल्ने न्यानो कपडा संकलन गर्ने भएको छ । समितिको सोमवार बसेको बैठकले जाडो तथा शितलहरबाट अतिबिपन्न नगरवासीलाई वितरण गर्नका लागि पुनः प्रयोग गर्न सकिने कपडा संकलन गर्ने निर्णय गरेको हो ।
नगर प्रमुख शम्भुलाल श्रेष्ठको अध्यक्षतामा बसेको समितिको बैठकले बिभिन्न सरोकारवाला सम्मिलित न्यानो कपडा संकलन समिति समेत गठन गरेको प्रमुख प्रशासकीय अधिकृत कृष्ण प्रसाद सापकोटाले जानकारी गराउनुभयो । उहाँका अनुसार पुनः प्रयोग गर्न मिल्ने कपडा संकलन गर्नका लागि आर्थिक विकास समितिका संयोजक समेत रहनुभएका वडा नं ८ का वडाध्यक्ष कविराज आचार्यको नेतृत्वमा ६ सदस्सीय न्यानो कपडा संकलन समिति गठन गरिएको छ ।
उक्त समितिमा उद्योग वाणिज्य संघका अध्यक्ष लेखनाथ न्यौपाने , बजार विकास समितिका अध्यक्ष तारा प्रसाद गौतम , पत्रकार रवि पाण्डेय , रेडक्रसको तर्फबाट राधा ढकाल सदस्य रहेको उहाँले जानकारी दिनुभयो । संकलित कपडालाई एक द्वार प्रणाली मार्फत वितरण गर्ने योजना रहेको सापकोटाले बताउनुभयो। त्यस्तै जाडोलाई ध्यान दिदै राहत दिने उद्देश्यले जिल्ला बन पैदावार आपूर्ति समितिबाट सहुलियत दरमा २ चट्टा दाउरा नगरपालिकाले खरिद गरेर बिपन्न बस्तीहरुका सामुहिक धुनी लगाउने समेत निर्णय भएको प्रमुख प्रशासकीय अधिकृत सापकोटाले जानकारी दिनुभयो ।
नगरका प्रमुख शितलहर प्रभावित विपन्नहरु रहेका बस्तीहरुमा सम्बन्धित वडाध्यक्षहरुको समन्वयमा टोल विकास समितिहरुलाई परिचालन गरि अति विपन्न हरु बसोबास गर्ने चोकहरुमा सामूदायिक आगो ताप्ने प्रबन्ध मिलाइने सापकोटाको भनाई छ । यसको समग्र व्यवस्थापन गर्न नगरपालिका अन्तरगत गठित बन तथा बातावरण समितिका संयोजक रहनुभएका वडा नम्बर १३ का वडाध्यक्ष नरबहादुर चौधरीको संयोजकत्वमा इलाका प्रहरी कार्यालयका प्रहरी नायव निरीक्षक भिमसेन विष्ट , नगर प्रहरी पिताम्बर सापकोटा, पारिजात सामुदायिक बन उपभोक्ता समुह र चिसापानी सामुदायिक बनका प्रतिनिधि सदस्य रहने गरी समिति गठन गरिएको छ ।
दाउरा वितरणलाई प्रभावकारी बनाउन सामुदायिक बनले आफ्नो कार्ययोजना भित्र रहेर वितरण गर्ने र नगरपालिकाले वितरण गर्ने दाउरालाई सम्बन्धित वडाध्यक्षहरुको समन्वयमा एकद्वार प्रणालीबाट वितरण गर्ने समेत योजना बनाइएको छ । बैठकमा नगर प्रमुख श्रेष्ठले सबै सरोकारवालाहरु मिलेर नगरवासीलाई जाडो तथा शितलहरबाट बचाउनुपर्नेमा जोड दिनुभयो । बैठकमा उपप्रमुख रुद्र प्रकाश उपाध्याय, विपद् ब्यवस्थापन समितिका फोकल पर्सन पुस्कर काफ्ले , कृष्ण थापालगायत समिति आबद्ध बिभिन्न संघसंस्थाका प्रतिनिधिहरुले बिभिन्न सुझाव दिनुभएको थियो।