तिलोत्तमाको मध्यावधि समीक्षामा विभिन्न व्यक्ति सम्मानित,सम्मानित हुनेमा किसानदेखि जेष्ठ नागरिक र पत्रकारसम्म ।

वि.पि. गौतम
तिलोत्मा,पौष–२१
रुपन्देहीको तिलोत्तमा नगरपालिकाले विभिन्न व्यक्ति, संस्था, आमा समूह, क्लव, विद्यालयहरुलाई सम्मान गरेको छ । विभिन्न विधामा उत्कृष्ट कार्यसम्पादन गर्नेहरुलाई मध्यावधि समीक्षाको अवसरमा सोमबार सम्मान गरिएको हो । यसरी सम्मान गरिनेमा किसानदेखि जेष्ठ नागरिक र पत्रकारसम्म छन् । नगरपालिकाले तिलोत्तमा नगरमा भएका विकास निर्माण, सेवा प्रवाह, प्रवद्र्धनात्मक अभियानलगायतका गतिविधिलाई पत्रकारितामार्फत् जनमानसमा पुर्याउने काममा महत्वपूर्ण योगदान पुर्याउने पत्रकारहरुमध्ये टोपराज शर्मालाई सम्मान गरेको छ । शर्मा अनलाइन खबर डटकमका वरिष्ठ संवाददाता हुनुहुन्छ ।यस्तै उत्कृष्ट किसानतर्फ तिलोत्तमा–१४ रगरगञ्जका तरकारी उत्पादक किसान पन्नालाल केवट र वडा नं. १३ वनकट्टीकी पशुपालक किसान दुर्गा भण्डारीलाई नगदसहित सम्मान गरिएको छ । नगरपालिकाले अघि सारेका विभिन्न अभियान, क्रियाकलापमा सक्रिय सहभागिता जनाउने वडा नं. ८ को प्रदीपनगर टोल विकास संस्था, वडा नं. २ को जागृति टोल विकास संस्था, वडा नं. १० को गरिमा टोल विकास संस्थालाई पनि नगदसहित सम्मान गरिएको छ । नगरका वडाहरुमध्ये उत्कृष्ट वडाको रुपमा वडा नं. २ र वडा नं. ९ पनि सम्मान गरिएको छ ।

यसैगरी नमस्ते नेपाल, जागृति आमा समूह, प्रगति महिला परिवार पनि सम्मानित भएका छन् । नगरभित्रका जेष्ठ नागरिकतर्फ तिलोत्तमा–८ का १०६ वर्षका केशवराम ज्ञवाली र तिलोत्तमा–३ की १०१ वर्षीय गंगादेवी पंगालीलाई पनि नगदसहित नगरपालिकाले सम्मान गरेको छ ।नगरपालिकामा सबैभन्दा बढी सम्पत्ति कर तिर्ने केशवमणि आचार्य दिक्षित, व्यवसाय कर तिर्ने टाइगर प्यालेस रिसोर्ट, कृषितर्फ मुलुकमैं बढी कर तिर्ने अन्नपूर्ण एग्रो इण्डिष्ट्रिज प्रालिलाई पनि सम्मान गरिएको छ । सेमरा बजार स्वास्थ्य चौकी अन्र्तगत्की स्वास्थ्य स्वयंम्सेविका चाँदनी गिरी, टिकुलिगढ स्वास्थ्य चौकीकी उमादेवी सुवेदी पनि नगरपालिकाको सम्मानमा परेका छन् ।शिक्षातर्फ २०७५ को एसईईमा उत्कृष्ट नतिजा ल्याउने दिया पाण्डे, चाहना थापा, आरती शर्मा, विधान नेपाल, सौरभ पौडेल, क्रिष्टिना रास्कोटी, निकिता खनाल, शान्ति नमूना मावि, जनजागृति मावि, सेमरी आधारभूत विद्यालय र प्यारामाउण्ट इंलिस बोर्डिङ स्कुललाई पनि सम्मान गरिएको छ । यसैगरी उत्कृष्ट कर्मचारीको रुपमा प्रदीप वन, इन्द्रदत्त सापकोटा र चन्द्रा थापालाई पनि नगरपालिकाले सम्मान गरेको छ ।प्रदेश सरकारका उद्योग, पर्यटन, वन तथा वातावरण मन्त्री लिला गिरीको प्रमुख आतिथ्यमा भएको कार्यक्रममा नगर प्रमुख बासुदेव घिमिरेले जनप्रतिनिधि आएपछि हालसम्म भएको कार्यप्रगति विवरण पेश गर्नुभएको थियो । त्यसअवसरमा प्रमुख अतिथि गिरीले दिगो हुनेगरी विकासका काम गर्न जनप्रतिनिधिहरुलाई सुझाव दिनुभयो । मन्त्री गिरीले नगरपालिकाले अढाई वर्षमा गरेको समग्र कार्य उल्लेखनीय रहेको बताउनुभयो । यस्तै प्रमुख जिल्ला अधिकारी महादेव पन्थले तिलोत्तमाले सुरु गरेका नौला अभियानहरु सबैका लागि अनुकरणीय रहेको उल्लेख गर्नुभयो ।

कार्यक्रममा नेपाल कम्युनिष्ट पार्टीका नेता यज्ञ गैरे, मोहन चापागाईं, तिलोत्तमा उद्योग वाणिज्य संघका अध्यक्ष गुणनिधि भण्डारीलगायतले नगरको समग्र विकाशमा जनचासो बढेकाले नगरको विकाश अझ सशक्त हुने विश्वास ब्यक्त गर्नुभयो । सो अवसरमा नगरका तपÞर्mबाट स्वागत मन्तव्य राख्दै नगर उपप्रमुख जागेश्वरी चौधरीले विकास निर्माण र सबै प्रकारका अभियानमा नगरबासीबाट प्राप्त सहयोगप्रति धन्यवाद व्यक्त गर्नुभयो । प्रमुख प्रशासकीय अधिकृत माधव शर्माको सञ्चालनमा भएको कार्यक्रममा विभिन्न राजनीतिक दलका नेता, संघ–संस्था, टोल विकास संस्थालगायतका प्रतिनिधिहरुले नगरपालिकाले गरेका काम–कारवाहीको सन्दर्भमा विभिन्न सुझावहरु दिनुभएको थियो ।