२७ मंसिर
बर्दघाट नगरपालिका नगर प्रमुख धीरज शर्मा बस्यालले मासु उत्पादनमा नगरलाई आत्मनिर्भर बनाउन कृषकले उत्पादन लागत घटाउनुपर्नेमा जोड दिनुभएको छ । नेपाल ब्यवसायिक बाख्रापालक महासंघ बर्दघाट नगर समितिको प्रथम अधिबेशन उद्घाटनसत्रलाई सोमवार सम्बोधन गर्दै उहाँले उत्पादन लागत कम नगरे सम्म कृषकहरु टिक्नै नसक्ने बताउनुभयो ।
उत्पादन लागत कम नगरे सम्म मुनाफा हुदैन – उहाँले सो अवसरमा भन्नुभयो – मुनाफा विना ब्यवसाय दिगो हुदैन । हामी तपाईहरुको उत्पादनको लागत कम गर्न प्रयत्नरत छौ । नगर प्रमुख बस्यालले नगरले पशु तथा कृषि विकासमा उल्लेख्य काम गरेको बताउदै नगरलाई छिट्टै मासुमा आत्मनिर्भर बनाउने बताउनुभयो । हामीले बाख्रा पकेट कार्यक्रम संचालन गर्दै आएका छौ – उहाँले भन्नुभयो – अब आत्मनिर्भर हुने पालो मासुजन्य बस्तुको हो । बर्दघाट नगर दुध तथा अण्डामा आत्मनिर्भर भइसकेको उहाँले जानकारी दिनुभयो ।
कार्यक्रममा उपप्रमुख मायादेवी पौडेलले महिलाहरुको जिविकोपार्जनमा बाख्रापालन अति महत्वपुर्ण ब्यवसाय रहेको बताउनुभयो । उहाँले कृषकहरुको हितका लागि नगरपालिका सधै तत्पर रहेको बताउनुभयो ।
कार्यक्रममा बर्दघाट नगरपालिकाका प्रमुख प्रशासकीय अधिकृत मेघनाथ पाध्याले नगरले आफ्नो साधन स्रोतको सीमाभित्र रहेर बाख्रापालकहरुलाई सहयोग गर्दै आएको चर्चा गर्दै नगरपालिका सधै कृषकको पक्षमा रहेको बताउनुभयो ।
उक्त कार्यक्रमको समन्वय तथा सहकार्य बर्दघाट नगरपालिकाको रहेको थियो । कार्यक्रममा बर्दघाट नगरपालिका पशुपंन्छी विकास शाखाका भेटेनरी अधिकृत भरत लम्साल, नेपाल ब्यवसायिक बाख्रापालक महासंघका जिल्ला अध्यक्ष घनश्याम आलेलगायतले शुभकामना ब्यक्त गर्नुभएको थियो ।
त्यस्तै महासंघको बन्द सत्रले पशुपति न्यौपानेको अध्यक्षतामा १५ सदस्सीय नगर समिति चयन गरेको छ । समितिको उपाध्यक्षमा धुब्र कुमारी सापकोटा, सचिवमा सुजन खनाल र कोषाध्यक्षमा दान प्रसाद चापागाई रहनुभएको छ ।
त्यस्तै सदस्यहरु गोपाल पौडेल , बीर बहादुर राई, लक्ष्मी रिजाल, आइशोभा तामाङ, लिला ढकाल, सन्तोष लामिछाने ,यशु तामाङ, बिष्णु माया तामाङ, मोहन गुरुंग, नारायण विश्वकर्मा रहनुभएको छ ।
अधिबेशनमा नीजि ब्यवसायिक फर्म, बाख्रापालक समुह तथा सहकारी समुहका ४५ बढी प्रतिनिधि पर्यबेक्षकहरुको सहभागिता रहेको थियो ।
अधिबेशनले पुष १ गते हुने जिल्ला अधिबेशनका लागि ७ जना जिल्ला प्रतिनिधि समेत सर्बसम्मत चयन गरेको छ । जसमा रवि पाण्डेय, पशुपति न्यौपाने , सुजन खनाल,लक्ष्मी रिजाल,आइशोभा तामाङ, गोपाल पौडेल, नारायण विश्वकर्मा रहनुभएको छ । अधिबेशन हरि प्रसाद दुवाडीको अध्यक्षतामा भएको थियो ।