रवि पाण्डेय
बर्दघाट,पौष–१
पश्चिम नवलपरासीको बर्दघाट नगरपालिकाको शिक्षा युवा तथा खेलकुद शाखाले गत शैक्षिक सत्रमा कक्षा पाँचमा अध्ययरत बिद्यार्थीहरुको सिकाई उपलब्धि मापन गर्ने कार्य सम्पन्न गरेको छ । नगरक्षेत्रमा रहेका ३७ वटा सामुदायिक बिद्यालय मध्ये कक्षा पाँच संचालन रहेका ३४ वटा बिद्यालयका बिद्यार्थीहरुलाई प्रमुख पाँच बिषयमा शैक्षिक सत्र– २०७८ मा उपलब्धि मापन परीक्षा गरिएको थियो ।
उक्त मापन परिक्षामा बर्दघाट–४ दिब्यनगरमा रहेको नव दिब्यज्योति आधारभुत बिद्यालयले तुलनात्मक रुपमा उत्कृष्ट सिकाई उपलब्धि हासिल गरेको छ । कक्षा ६ सम्म अध्ययन हुने सो बिद्यालयले नगरका सबै बिद्यालयलाई उछिन्दै सिकाई उपलब्धिमा आफूलाई उत्कृष्ट स्थानमा राखेको हो ।
नेपाली , अग्रेजी, गणित , बिज्ञान र सामाजिक बिषयमा गरिएको सिकाई उपलब्धि मापन परिक्षाको यसै साता बिष्लेषण कार्यक्रम समेत भएको हो । बर्दघाट नगरपालिका शिक्षा युवा तथा खेलकुद शाखाले शैक्षिक सत्र– २०७८ को कक्षा ५ को उपलब्धि मापन परीक्षा फरक बिद्यालयका शिक्षकहरु पठाएर गरेको थियो । बिषय शिक्षकबाट प्रश्न पत्र निर्माण गरेर बिधिपुर्वक सिकाई उपलब्धि मापन परिक्षा गरिएको शिक्षा युवा तथा खेलकुद शाखा ले जनाएको छ ।
शिक्षा युवा तथा खेलकुद शाखा प्रमुख उपसचिव लोकराज पन्थीले सिकाई उपलब्धि मापन परिक्षाले नगरको शैक्षिक गतिबिधिलाई मार्ग निर्देशन गर्ने भएकोले यसको बिश्लेषणका आधारमा शैक्षिक योजना बनाउन सहज हुने बताए । हामीले एउटा असल शुरुवात गरेका छौ , यसले पक्कै पनि हामीलाई पृष्ठपोषण दिनेछ, त्यसबाट आगामी शैक्षिक योजना बनाउन सहज समेत हुनेछ – हाल नगरपालिकाका निमित्त प्रमुख प्रशासकीय अधिकृत समेत रहेका पन्थीले भने –शैक्षिक सुधारका लागि यो शुरुवात मात्र हो । पक्कै पनि यस कार्यबाट सबै बिद्यालयको सिकाई उपलब्धि सुधार हुन्छ ।
उपसचिव पन्थीले सिकाई उपलब्धि परिक्षाले शैक्षिक क्षेत्रमा प्रोत्साहन मिल्नेमा आफू विश्वस्त रहेको बताए । शैक्षिक सत्र २०७८ को कक्षा ५ को उपलब्धि मापन परीक्षामा बर्दघाट–४ दिब्यनगरमा रहेको नव दिब्यज्योति प्राविले उत्कृष्ट नतिजा ल्याएको उनले जानकारी दिए । नव दिब्यज्योति स्कुल कक्षा ५ को उपलब्धि मापन परीक्षामा उत्कृष्ट देखिएको छ –उनले भने – अब समग्र नतिजाको बिश्लेषण समेत गरिएको छ । त्यसैका आधारमा सबै बिद्यालयले राम्रो गर्नेमा आशावादी छौं ।
उपसचिव पन्थीले अनुसार नव दिब्य ज्योति बिद्यालयमा भने पाँच वटै प्रमुख बिषयमा ६० प्रतिशत माथि सिकाई उपलब्धि देखिएको जानकारी गराए । त्यस्तै गुणस्तरीय शिक्षाका लागि नगर फरक ढंगले लागेको बताउदै पन्थीले यस कार्यबाट अब सबैलाई उत्पे्ररणा हुने बताए ।
नव दिब्य ज्योतिले अग्रेजीमा सबैभन्दा बढी ७९.५ प्रतिशत सिकाई उपलब्धि हासिल गरेको छ भने सबैभन्दा कम बिज्ञानमा ६१.५ प्रतिशत रहेको शिक्षा युवा तथा खेलकुद शाखाको तथ्यांकमा उल्लेख छ । त्यस्तै नेपालीमा ७० , गणितमा ७४ , सामाजिकमा ६८ प्रतिशत सिकाई उपलब्धि गरेको छ ।
त्यस्तै शिक्षा युवा तथा खेलकुद शाखाका अधिकृत गोबिन्द शर्माका अनुसार नगरमा रहेका सामुदायिक बिद्यालयको कक्षा पाँचको सिकाई उपलब्धिको औसत क्रमशः नेपाली बिषयमा ५२,अग्रेजीमा ६०.६ गणितमा ३२ बिज्ञानमा ४३.२६ र सामाजिक बिषयमा ४४.२५ प्रतिशत रहेको छ । औषत सिकाई उपलब्धिमा सबैभन्दा कमजोर स्थिति गणित बिषयमा रहेको छ भने अग्रेजी बाहेक कुनै पनि बिषयमा ६० प्रतिशत सिकाई उपलब्धि देखिएको छैन् ।
नव दिब्य ज्योति आधारभुत बिद्यालयकी प्रधानाध्यापक सरस्वती भट्टराईले सिकाई उपलब्धि मापनले आफूहरुलाई खुसी लागेको बताइन् । उनले बिद्यालयमा सिमित साधन स्रोतका बीच भएको शिक्षण सिकाई क्रियाकलापबाट आएको नतिजाले बिद्यालय परिवारलाई हर्षित बनाएको जानकारी दिईन् । यो हाम्रा लागि एउटा उत्प्रेरणा हो, तर यसैबाट पुर्ण सन्तुष्ट भइहाल्ने कुरा होइन –उनले भनिन् – हामीले धेरै गर्न सक्छौ, अझै गर्न सक्छौ भन्ने नै हो ।
प्रधानाध्यापक भट्टराईले उत्कृष्ट सिकाई उपलब्धि आउनुमा बिद्यालयका सबै सरोकारवालाको योगदान रहेको बताइन् । शैक्षिक सत्र– २०७८ मा कक्षा पाँचका प्रमुख पाँच वटा प्रति बिषयमा २० पुर्णाक सहित कुल १०० पुर्णांकको मापन परिक्षा गरिएको थियो ।